ယာဉ်တိုက်မှုမဖြစ်ရန်
( Active
safety ) ရှေ့လေကာမှန်/
ယာဉ်အတွင်းအသံ ဆူညံမှုနည်းပါးခြင်း
ယာဉ်မောင်းမြင်ကွင်းကောင်းမွန်ခြင်း၊ယာဉ်အတွင်းအသံဆူညံမှုနည်းပါးခြင်း၊အချက်ပြများ
မှန်ကန်မှု နှင့် ကောင်းမွန်မှု၊ လမ်းနှင့် ထိတွေ့မှု ကောင်းမွန်မှု စတာတွေဟာ ယာဉ်တိုက်မှု
မဖြစ်ဘို့ ကာကွယ်ရာမှာအဓိက ထင်သာမြင်သာဖြစ်တဲ့ အချက်တွေပါ၊
ရှေ့လေကာမှန်ကြောင့် ယာဉ်မောင်းဆီကို
ဝင်လာမယ့် ဖုန်မှုန့်၊ မိုးရေ စတာတွေကိုကာကွယ်နိုင်တယ်၊ ( ကလေးကအစ သိပြီးသားပါ) ရေသုတ်တံ( wiper ) နဲ့ ရေဖြန်းပေးတဲ့ကိရိယာ
(wiper washer ) က မြင်ကွင်းကို ရှင်းလင်း စေမှာပါ။ နောက်ကြည့်မှန်တွေကတော့ ကိုယ့်နောက်က
ယာဉ်ကြော အခြေအနေ ကိုသိနိုင်မှာပါ။ ဒီတော့ အဲဒါတွေ ကောင်းမွန်စွာအသုံးပြုနိုင်မှု ရှိ/မရှိ
သိဘို့ လိုအပ် လာပါတယ်။ ရှေ့လေကာမှန် အက်ကွဲမှုတွေဟာယာဉ်မောင်း မြင်ကွင်းကိုကွယ်နိုင်သလား၊
မြင်ကွင်းကို ထိခိုက်မှုန်ဝါးစေသလား ဆိုတာတွေကိုဆန်းစစ် စစ်ဆေးဘို့ လိုလာပါတယ်။ စက်နဲ့စစ်လို့မရဘဲ
မျက်မြင်ဆုံးဖြတ်ရတာပါ။ နိုင်ငံအချို့မှာ မှန်တွေကို အောက်ပါအတိုင်း စစ်ဆေးဘို့ သတ်မှတ်ထားတာတွေ့ရပါတယ်။
(က) ရှေ့လေကာမှန်၊
ဘေးမှန်နှင့် နောက် ပိတ် မှန်အားလုံး၏လုံခြုံစိတ်ချရမှုနှင့်
မျက်မြင် အခြေအနေကို စစ်ဆေးရန်
(ခ) ရှေ့မှန်ကြီးတွင်
လုံခြုံရေးမှန်(Safety Glass )အမှတ်အသားပါ/
မပါ စစ်ဆေးရန်
(ဂ)ယာဉ်မောင်း
ထိုင်ခုံမှကြည့်လျှင် လုံလောက်သော မြင်ကွင်း ရရှိရန်နှင့် ၎င်းကို
အရာဝတ္ထုများ၊ စတစ်ကာများဖြင့် ကွယ်နေမှု ရှိ/
မရှိ စစ်ဆေးရန်
(ဃ) ယာဉ်မောင်းဘေးပြတင်းပေါက်
ကောင်းမွန်စွာ အသုံးပြုနိုင်မှု ရှိ/ မရှိ
စစ်ဆေးရန်
ရှေ့လေကာမှန်ကြီးကို ဇုံ ( ၃ ) ခု ခွဲပြီး စစ်ဆေးကြတာတွေ့ရပါတယ်၊၊အောက်မှာ
ပုံနဲ့ တင်ပြထားပါတယ်။
ဇုံ-A မှာ ကွဲအက်မှု ရှိရင် စက်ဝိုင်းပုံပမာဏဟာ ၁၀ mm ထက်မပိုရပါဘူး၊
ကွဲအက်မှုဟာ ၂-ခုထက်မပိုရတဲ့ အပြင် ၎င်းတို့ရဲ့ အကွာအဝေးဟာ ၁၀၀ mm (၄-လက်မ)ထက် ပိုရပါမယ်။
ဇုံ-B မှာ ကွဲအက်မှု ရှိရင် စက်ဝိုင်းပုံပမာဏဟာ ၂၀ mm ထက်မပိုရပါဘူး၊
အက်ကွဲကြောင်းဆိုရင် ၃၀ mm အောက်ဖြစ်ရပါမယ်။ ကွဲအက်မှု/အက်ကွဲကြောင်းဟာ ၂-ခုထက်မပိုရတဲ့
အပြင် ၎င်းတို့ရဲ့ အကွာအဝေးဟာ ၁၀၀ mm (၄-လက်မ)ထက်
ပိုရပါမယ်။
ဇုံ-C မှာ ကွဲအက်မှု ရှိရင် စက်ဝိုင်းပုံပမာဏဟာ ၄၀ mm(တစ်လက်မခွဲ)
ထက်မပိုရပါဘူး၊ ကွဲအက်မှုဟာ ၂-ခုထက်မပိုရတဲ့ အပြင် ၎င်းတို့ရဲ့ အကွာအဝေးဟာ ၁၀၀
mm (၄-လက်မ)ထက် ပိုရပါမယ်။
ကျွန်တော်တို့ဆီမှာတော့
အပိုပစ္စည်း ရှားပါးမှု၊တချို့ကားတွေမှာ မှာယူမှုတွေအတွက် ပေးရတဲ့အချိန်၊ အပိုပစ္စည်းတွေရဲ့ဈေးနှုန်း
တွေကြောင့် အဲဒီလိုသေချာမသတ်မှတ်နိုင်တာ ထင်ပါတယ်။
ယာဉ်အတွင်းအသံ ဆူညံမှုနည်းပါးခြင်းဟာ ယာဉ်မောင်းကို
အာရုံစူးစိုက်မှု ကောင်းမွန်စေတဲ့အပြင် ယာဉ်ကထွက်ပေါ်တဲ့ ပုံသဏ္ဍာန်မမှန်တဲ့ အသံတွေ အခြားယာဉ်တွေရဲ့ အသံနဲ့ အချက်ပြမှုတွေကို ကြိုတင်သိနိုင်မှာပါ။
အင်ဂျင်နဲ့လမ်းကြောင့်ဖြစ်ပေါ်တဲ့ အသံတွေကြောင့် ယာဉ်စီးနင်းသူတွေ
အနှောင့်အယှက် မဖြစ်အောင်ခရီးသည်ထိုင်တဲ့ နေရာတွေကို သီးသန့်ဒီဇိုင်း ပြုလုပ်ထားလေ့
ရှိပါတယ်။ အသံကိုစုပ်ယူဘို့ တပ်ဆင်ရတဲ့ ပစ္စည်းတွေက ယာဉ်ကိုအလေးချိန် ပိုတိုးစေပြီး
ဈေးကြီးတာကြောင့် ဆူညံသံတွေ လျော့ချနိုင်မယ့် နည်းလမ်းတွေ ရှာဖွေနေကြတာလေ့လာ ရပါတယ်။
ဥပမာအားဖြင့် ယာဉ်မှာတပ်ထားတဲ့ မိုက်ကရိုဖုန်းလေးတွေက တဆင့် အသံလှိုင်းကို
အာရုံခံပြီး ကြိမ်နှုန်းတူညီတဲ့ တန်ပြန်အသံလှိုင်းကို စပီကာလေးတွေက ပြန်ထုတ်ပေးပြီး
ချေဖျက်တာပါ။ ဒါပေမယ့် ကြိမ်နှုန်းတွေက မတူညီ၊ များပြားလွန်းတဲ့အတွက် လက်တွေ့ လုပ်ဆောင်စမ်းသပ်မှု
တွေမှာ တော်တော်ခက်တယ်လို့သိရပါတယ်။ လောလောဆယ်မှာတော့ ပုံမှန်မောင်းနှင်ချိန်မှာ ထွက်တဲ့
ဆူညံသံတွေကိုဘဲ ချေဖျက်လို့ ရသေးတယ်လို့ လေ့လာရပါတယ်။
နောက်ပိုင်းစမ်းသပ်မှုတွေမှာ အင်ဂျင်အဝင်နဲ့အထွက်မှာ အပေါ်ကတင်ပြတဲ့
အလားတူ စနစ်မျိုးနဲ့ ဆူညံသံတွေ လျော့ချနိုင်အောင်၊ ယာဉ်အမြန်နှုန်းအရ တွက်ချက်ပြီး
တချို့ဆလင်ဒါတွေအလုပ်မလုပ်အောင်(deactivate)နည်းစနစ်တွေ ရှာဖွေနေတာကို လေ့လာ
ရပါတယ်။ ဒီစနစ်တွေကိုလည်း နောက်ပိုင်းမှာ (Electronic Control Module) နဲ့ဘဲချိတ်ဆက်ဆောင်ရွက်ရမှာပါ။
ယာဉ်အတွင်း အသံဆူညံမှုလျော့သွားရင် စီးနင်းသူတွေ စိတ်အနှောင့်အယှက်ဖြစ်မှု
လျော့နိုင်ပြီး ယာဉ်မောင်းရဲ့ မော်တော်ယာဉ် ထိန်းသိမ်းမှု အပိုင်းမှာလည်း ပိုပြီး ကောင်းလာမှာပါ။
အထူးသဖြင့် ယာဉ်ဟောင်းတွေများနေသေးတဲ့ ကျွန်တော်တို့ နိုင်ငံရဲ့ အခြေအနေမှာယာဉ်က ထွက်တဲ့
ပုံမှန်မဟုတ်တဲ့အသံတွေ၊ အခြားယာဉ်တွေရဲ့အချက်ပြမှုတွေ၊ ရုတ်တရက် ဖြစ်လာနိုင်တဲ့ မလိုလားအပ်တဲ့
ယာဉ်တိုက်မှု ဖြစ်နိုင်တဲ့ အခြေအနေတွေကိုပိုပြီး သတိထား မိလာမှာပါ။
တကယ်တော့ အသံဆူညံမှု နည်းပါးအောင်လုပ်တာဟာ စီးနင်းသူတွေ သက်တောင့်
သက်သာ ရှိဘို့နဲ့ ပတ်ဝန်းကျင်ဆူညံမှု စံညွှန်းတွေနဲ့ ညီအောင် ထိန်းချုပ်နိုင်ဘို့ပါ။
Active Noise Cancellation
(ANC) ကိုစောစောကတင်ပြတဲ့အသံလှိုင်းတွေ တန်ပြန်ထုတ်လွှင့်ပေးတာကကစပြီး
ခေတ်မှီယာဉ်တွေမှာ တပ်ဆင်နေပြီလို့ လေ့လာရပါတယ်။
